Log muhabbat karne vaale

chupke chupke jal jaate haiN
log muhabbat karne vaale
purva sang nikal jaate haiN
log muhabbat karne vaale

aankhoN aankhoN chal paRte haiN taaroN kii qandiil liye
chaand ke saath hii Dhal jaate haiN
log muhabbat karne vaale!

dil meiN phuul khila dete haiN
log muhabbat karne vaale
aag meN raag jaga dete haiN
log muhabbat karne vaale
paani biich bataasha suurat Khud to ghulte rehte haiN
sam ko shehad bana dete haiN
log muhabbat karne vaale

Khwaab Khushi ke bo jaate haiN
log muhabbat karne waale
zaKhm diloN ke dho jaate haiN
log muhabbat karne waale
titli titli lehraate haiN phuuloN ki ummiid liye
ik din Khushbu ho jaate haiN
log muhabbat karne vaale

ban jaate hain naqsh vafa ka
log muhabbat karne vaale
jhonka haiN bechain hava ka
log muhabbat karne vaale
jalii hui dharti pe jaise baadal ghir kar aayeN
basti par haiN fazl khuda ka
log muhabbat karne vaale